ਸੱਚ ਜਾਣੀ

ਸੱਚ ਜਾਣੀ, ਝੂਠ ਨਹੀਂ,
ਮੈਨੂੰ ਤੂੰ ਤੇ ਰੱਬ ਨਾ ਮਿਲਿਆ ਪੁਜਾਰੀਆਂ ਨੂੰ।
ਜੋ ਲੱਥੇ ਨਾ ਉਮਰ ਸਾਰੀ,
ਐਸਾ ਰੰਗ ਨਾ ਕੋਈ ਮਿਲਿਆ ਲਲਾਰੀਆਂ ਨੂੰ।
ਦੁਨੀਆ ਬਗੀਚੀ ਕੰਡਿਆਂ ਦੀ
ਨੀਂ ਕਿੰਨਾ ਚਿਰ ਸੰਭਾਲੇਗੀ ਤਨ ਫੁਲਕਾਰੀ ਨੂੰ।

ਨੀਂ ਰਾਤ ਦੀ ਪੀਤੀ, ਸੁਬਹ ਉਤਰ ਜਾਵੇਗੀ।
ਮਿਲੀ ਹੈ ਜੋ ਜਿੰਦ, ਓਹ ਵੀ ਗੁੱਜਰ ਜਾਵੇਗੀ।
ਵਾਅਦੇ ਕਰਕੇ ਇਹ ਦੁਨੀਆ ਮੁਕਰ ਜਾਵੇਗੀ।
ਬੈਠੀ ਹੈਪੀ ਨਾਲ ਹਰ ਸਵਾਰੀ ਉਤਰ ਜਾਵੇਗੀ।

ਲੁੱਟਿਆ ਸਾਨੂੰ

ਲੁੱਟਿਆ ਸਾਨੂੰ ਉਹਨਾਂ ਨੇ ਮੀਤ ਬਣਕੇ
ਜੋ ਬੁੱਲ੍ਹਾਂ 'ਤੇ ਰਹਿ ਸਾਡੇ ਗੀਤ ਬਣਕੇ
ਓ ਤੁਰ ਗਏ, ਅਸੀਂ ਖਲੋਏ ਅਤੀਤ ਬਣਕੇ
ਤੱਤੀ ਧੁੱਪ 'ਚ ਸੜ੍ਹਦਿਆਂ ਛੱਡ ਗਏ ਹੈਪੀ,
ਆਏ ਸੀ ਜੋ ਠੰਡੀ ਹਵਾ ਸ਼ੀਤ ਬਣਕੇ
---------------------------------
ਤੂੰ ਸੱਜਣਾ ਉਸ ਚੰਦ ਵਰਗਾ ਐ
ਜਿਸਨੂੰ ਚਾਹਕੇ ਵੀ ਪਾਇਆ ਜਾ ਸਕਦਾ ਨਹੀਂ
ਤੇਰੇ ਚੇਤਾ ਅਭੁੱਲ ਯਾਦ ਜਿਹਾ,
ਲੱਖ ਕੋਸ਼ਿਸ਼ਾਂ ਬਾਅਦ ਵੀ ਭੁੱਲਾਇਆ ਜਾ ਸਕਦਾ ਨਹੀਂ
ਅੱਖਰ ਬਣ ਘੁਣ ਗਿਆ ਮੱਥੇ ਵਿੱਚ
ਜਿਸ ਨੂੰ ਮਰੇ ਬਿਨ੍ਹ ਮਿਟਾਇਆ ਜਾ ਸਕਦਾ ਨਹੀਂ
--------------------------------
ਰੁੱਤ ਬਿਰਹੋਂ ਦੀ ਆਈ ਲੈਕੇ ਹੰਝੂ ਹੌਂਕੇ ਦੁੱਖ ਸੌਗਾਤਾਂ
ਚਿੱਟੇ ਦਿਨ ਵੀ ਬਣ ਚੱਲੇ ਹੁਣ ਕਾਲੀਆਂ ਰਾਤਾਂ
ਹੋ ਗਈਆਂ, ਜੋ ਹੋਣੀਆਂ ਸਨ ਪਿਆਰ ਦੀਆਂ ਬਾਤਾਂ
ਹੁਣ ਵੇਲਾ ਆ ਗਿਆ, ਕਰੂੰ ਮੈਂ ਮੌਤ ਨਾਲ ਮੁਲਾਕਾਤਾਂ

ਨਾਂਅ ਤੇਰਾ

ਹੱਥ ਦੀਆਂ ਲਕੀਰਾਂ ਚੋਂ
ਮਿਟ ਗਿਆ ਨਾਂਅ ਤੇਰਾ
ਦਿਲ ਤੇ ਲਿਖਿਆ ਕਿਵੇਂ ਮਿਟਾਵਾਂ ਨੀਂ
ਜਿੱਧਰ ਵੇਖਾਂ
ਹਰ ਪਾਸੇ ਤੂੰ ਹੀ ਤੂੰ ਦਿਸਦੀ
ਦੱਸ ਮੈਂ ਬਚ ਕਿਹੜੀ ਰਾਹੇ ਜਾਵਾਂ ਨੀਂ
ਜੋ ਛਾ ਗਏ ਬੱਦਲ ਗਮ ਦੇ
ਮਨ ਦੇ ਅੰਬਰ 'ਤੇ
ਕਿਹੜੀ ਹਵਾ ਨਾਲ ਉਡਾਵਾਂ ਨੀਂ
------------------------------
ਜਿੰਦਗੀ ਦੇ ਪੰਨੇ ਜਦ ਵੀ ਪਲਟੇਂਗਾ
ਤੈਨੂੰ ਮਿਲਾਂਗੀ ਹਰ ਮੋੜ੍ਹ ਉੱਤੇ।
ਅੱਜ ਵੀ ਉੱਥੇ ਹੀ ਖੜ੍ਹੀ ਹਾਂ
ਛੱਡ ਗਿਆ ਸੀ ਜਿਸ ਰੋੜ੍ਹ ਉੱਤੇ ।।
--------------------------
ਜਿੱਤਾਂ ਬਹੁਤ ਦਰਜ ਕੀਤੀਆਂ,
ਪਰ ਜਸ਼ਨ ਵੇਲੇ ਕੱਲਾ ਰਹਿ ਗਿਆ
ਤੁਰ ਗਿਆ ਸੱਜਣ ਵੀ,
ਉਂਗਲੀ 'ਚ ਬੱਸ ਛੱਲਾ ਰਹਿ ਗਿਆ
ਇੱਕ ਬੰਦ ਕਮਰੇ 'ਚ
ਕਲਮ ਤੇ ਹੈਪੀ ਕੱਲਾ ਰਹਿ ਗਿਆ